teema

2020

de noah hed sech gwönscht en teema z'si, ond das bereits a de fasnacht 2019. bi jedem alass wo wägedem organisiert, werd ehre (scho fascht chli berüehmti) tee abotte. das hed de noah zom thema gmacht.

wägedem esch auso aus teema onderwägs gsi. bi wonderschönem wätter hend sie gässlet, met frönde filosofiert, öppe es tee-zwätschge tronke (de noah hed die erschti fasnacht chönne mettrenke), anderi maske bestuunet, met ehemalige gottis ond göttis agschtosse, natürlech fliissig tee usgschänkt (met ond ohni, aber emmer heiss) ond sie hend d'fasnacht in volle zöge gnosse. 

natürlech heds ou en tschellensch gäh. sie hend met de fasnächtler teetris gspöut ond hend tee-wörter gsuecht. tee-wörter send wörter wo es 'te' drenn hend ond den drus es 'tee' worde esch (gfendsch onder tee-wörter). rechtig betont, esches schwerig z'erkönne, was es no heisst. hedmer die useforderige gmeischteret, eschmer metere portion teesirup belohnt worde. das esch ou d'plagette gsi. es chlises shot-fläschli metere portion teesirup för eis tassli tee deheime.

es esch en schöni ond chorzwiligi fasnacht gsi. es hed wonderbari begägnige gäh ond de rupi, de noah ond d'cécile send glöcklech dor d'fasnacht gwanderet. 

danke a allne wo öis begleitet hend.

horrorskop

2019

drei aschtrologe onderwägs a de fasnacht. bi ehne hedmer chönne sis eigete, ganz persönleche horrorskop lo berächne, natürlech ab-gschtemmt of sini persönliche schtärne. ond horror send d'horrorskop gsi: dis lieblingsjoghurt werd usem sortimänt gnoh, dini schweger-muetter zieht bi der i, dini auti französischlehrerin ladt dech zom znacht i, du wersch iglade zomene helene-fischer-konzärt, i de nöschte badeferie rägnets nor……. 

wägedem hed zäme met e huufe fasnächtler ond fasnächtlerinne id schtärne gluegt ond sech dene horrorskop gschtöut. damet jede horrorskop-empfänger cha ou wiiter sini zeukonft i de schtärne läse, hend sie färnrohr verschänkt. 

zäme met andere fasnächtler send wägedem dor lozärn gässlet, hend öber schtärne filosofiert, hend ehre berühemti tee usgschänkt, hend vöu frönde troffe, hend die rüüdig schöni fasnacht gnosse.

wägedem bhautet d'fasnacht 2019 in sehr gueter erennerig. es esch so cool gsi.

bis nöchscht johr!

de bibert ond de tinar möchid goud

2018

scho a de letschte fasnacht esch s'mettuauter i de chöpf vom rupi ond vom noah omegeischteret. vom apotheker öber de händler send sie de zom alchemescht cho. i de herbschtferie send hetzigi diskussione gfühert worde. s'eihorn esch is schpöu cho. deför ond deweder. de noah he de de vorschlag brocht, dass är de verarmti könig esch wo de alchemescht rupi agschtöut hed zom goud z'mache. s'eihorn hed natürlech ned dri passet aber noch es paar reschersche hed d'cécile usegfonde, dass im mettuauter s'eihorn symbol vom quecksöuber gsi esch, womer zor härschtöuig vo goud brucht hed. ond so send die drü figure entschtande. de name hed sech usemene wortschpeli vom noah ergäh.

zäme met andere fasnächtler hend sie öber goudigi weisheite filosofiert, de rupi hed sache vergoudet, de noah hed die ganzi groppe suverän dor d'fasnacht gfüehrt.

natürlech, passend zom könig im mettuauter, hend sie ou es wappe gah, wo alli drü drenne vereint gsi send. das esch zäme met goudnaggets d'plagette gsi

es esch en entschlöinigti, goudigi ond rüüdig schöni fasnacht gsi.

de finish fäut!

es cha ned jede björn heisse

2017

wägedem esch aus wandergroppe europa onderwägs gsi of de suechi nochem finish. finnland ond de björn hend gfäut.

das Motto esch bim thäiländer entstande, wo wägedem super fein gässe hed ond sehr zuvorkommend behandlet worde esch. doch bim zahle heds de nömme so guet klappet. de rupi hed do gmeint: de finish fäut chli. ond de noah hed gantwortet: s'cha haut ned jede björn heisse. bedütet: de finish fäut - de finne fäut - alli finne heisse björn.

so esch wägedem ohni finn onderwägs gsi ond hed de finish gsuecht. alli hend sech im wandertescht chönne stöue. die wo dä bestande  hend, hend i wägedem döffe ehre lieblingsplatz in lozärn agäh. am güdiszischtig nochem monschter-corso esch wägedem of dä platz es foti vo ehrem finish go mache. de finish vo de fasnacht 2017 esch ofem möliplatz gsi.

aus plagette hed wägedem es ovosport-schöggeli verschänkt. wöu met ovo chammer ned besser, aber länger wandere.

wägedem hed en super schöni fasnacht met e huufe erklärige zom björn, de suechi nochem finish met allne, onderhautsami gschpröch ond tolle begägnige gha. wägedem nemmt en huufe schöni erennerige met.

s'rothändikäppli ond die böse gwolfs

2016

en gwolfigi fasnacht. de rupi ond de noah hend scho am güdiszischtig 2015 entschede, dass sie aus gwolf ad fasnacht 2016 wönd go. d'cécile hed sech eifach ned aus gwolf gseh. noch langem hin ond här hend de die beide gwolfs no es rothändikäppli öbercho. ond so esches en gwolfigi fasnacht gsi. met emene mini-gwolfplatz send sie onderwägs gsi. jede wo hed welle, hed chönne sis glöck versueche ond en houlin-wuanschtar wärde. so hed de gwolfclub vo wägedem en grosse metglederzuwachs erläbt. d'gwottifamelie hed i ehrem labor sogar jenschti verschedeni schöfli-gwolfbäll entwecklet ond wägedem met ehrem busech öberrascht.

aus plagette hed wägedem es büüteli met rasesome verschänkt, damet jede deheime sin eigeti gwolfrase hed chönne zieh. die wo de ball im erschte schlag inebrocht hend send so öisne houlinwuanschtars worde ond send met de begehrte gwolfballemedallie uszeichnet worde.

wägedem hed ein rüüdig gueti fasnacht gha, met e huufe gwolfer (sogar internationali), guete gspröch, toller musig ond e huufe schöni momänt.

 

schöttle

2015

es esch met fröid, luut, flissig ond motiviert gschöttlet worde. wägedem send lottokönige gsi ond hend flissig met öich lotto gschpöut.

eigentlech hend die öutere wägedem öufe welle si (wägem 11-johr-jubileom) doch de jöngeri wägedem hed das ned cool gfonde i strompfhose. noch e huufe korve send sie den bi bingo glandet, wöu sie das i de herbschtferie emmer gschpöut hend. drus esch de lotto - lottokönige - schöttle! worde. aus plagette hed wägedem en tresorschlössu verschänkt, wo de tresor aber gsi esch, das hend sie vergässe.

wägedem hed en rüüdig schöni fasnacht gha, met schpannende begägnige, länge täg, huufer super musig. körperlech zemlech erschöpft aber mental gschtärkt send wägedem us de fasnacht use cho.

sagehaft

2014

sagehaft esch als symbol gschtande förs mystische, förs sageomwobene, legändeomwobene, wonderbare, osserordentleche, zouberhafte, gruuslige, för en anderi wäut. wägedem hed sech of d'suech vo hondgälle gmacht, wörter gsammlet ond met dene ehri gschecht gschrebe. en fantastischi gschecht öber d'hondgälle.

de noah hed d'idee gha för das motto, wöu är doch mou öppis chli gföhrlechs hed welle si. so hed wägedem en rüüdig sagehafti fasnacht gha.

aus plagette hed wägedem es glöckssäckli met chline sache drenne verschänkt, om ehrne frönde schotz ond glöck met of de wäg z'gäh.

mer send höude

2013

aus superhöude send wägedem dor d'fasnacht 2013 gfloge. usemene wetz esch das motto langsam gwachse. vöu details send erarbeitet worde ond so esch s'höudemotto ou zom vorsatz förs johr 2013 worde. sin persönlichi höud im werkleche läbe z'si. zo sinere meinig z'stoh ond muetig z'si. wägdem hed wägedem ou d'höudepröfig abote, damet jede zo sim persönleche höud hed chönne wärde. öber die ganzi fasnacht send öppe 70 höude met de höudeplaggette vo wägedem uszeichnet worde.

die frotiere

2012

das motto hed en längi vorgschecht. wägedem hed es ganz es bsondrigs hochzitgschänk för frönde gsuecht. us rootlosigkeit hends dem hochzitspäärli welle frotierwösch för d'usschtür schänke. det drususe esch s'frotier entschtande, gmacht us ikea-frotiertüechli. de froko, de fröwe ond s'froni hend s'erschtimou es frotti ond en frötti gha. aus plaggette hends es chlises frotier-säckli metemene frotee verteilt.

gastronauten

2011

gastronauten esch es wortschpeli, zämegsetzt us gastro ond astronauten. zäme hed das de kellnerndi aschtronaute gäh vo de ferma glas-ha. sie hend en chlini bar debi gha ond flissig usgschänkt. d'mars ond milky-way plaggette hed jede gärn entgäge gnoh.

mer send raclette

2010

de noah hed ombedengt welle aus raclette ad fasnacht. d'cécile esch rüüdig is schwetze cho so en chäs, en gorke ond en härdöpfu z'mache. die ganzi fasnacht hend sie raclette gschmouze ond ongloublech vöu abnähmer gha. s'esch rege tuscht worde. chäs gäge kafi, tee, plaggette... es esch en fasnacht met e huufe loschtige ond schöne begägnige gsi. wägedem hed bon verteilt, met dene hesch jederziit es raclette öbercho.

mer im meer

2009

die idee esch ide ferie am meer entschtande. toucher met tschetski esch s'ziu gsi. es esch en tolli fasnacht gsi. so en toucher esch bsondrigs ond de noah esch rüüdig schtouz gsi of sini metfahrglägeheit, de rupi of sini broschthoor ond d'cécile (im werkleche läbe wasserschüch) hed vou schportlech gwerkt. damet alli ou es böud gha hend, wies im meer so usgseht, hends es foti ond es tonfeschli (de noah hedsi gmacht) öbercho.

rittersport

2008

de noah esch do en ongloubleche ritterfän gsi. d'cécile hed scho lang mou es ritterfrölein ond de rupi es schtriitross welle si. rittersport esches worde, wöu sie d'rittersport-schoggelädli aus ehri plaggette brucht hend. aus zeiche vo de sportlechkeit esch de schwert-greff en tornschueh gsi. leider hed de noah i dere fasnacht d'schpetzeblottere gha. zom glöck hed är aber es visier gha, so send d'mönsche om ehn ome ned so verschrocke.

schwiizer indianer

2007

de noah esch dä indianerfriik gsi. in aarou (kanton aargou!) hend wägedem i peruaner met panflöte zueglost. de noah hed welle wösse, öb das schwiizer indianer sigid ond s'motto esch gebore gsi. sitting chees esch de stamm vo wägedem gsi ond im kanu send sie dor d'fasnacht paddlet. aus plaggette hend sie ämmitalerchäs debi gha.

fauchi

2006

drache send im noah sini grosse frönde gsi. fauchi esch de stöuverträttend s'motto gsi. s'motto esch fascht verworfe worde, wöu de noah ombedengt rosa hed welle si ond de rupi sech schwär to hed demet. aus plaggette heds zöndhöuzli im schachteli gäh. trotz rosa, esches ganz en schöni fasnacht gsi.

bängeli

2005

de afang vo wägedem. ganz es improvisierts chleid, no keis wägeli, kei plaggette, nor jedes es chleid. sie hend nonig gwösst, öb de noah fröid hed a de fasnacht i de stadt. aber är esch begeischteret gsi. aus bänglei noah zwöschet em hemu cécile ond de höu rupi hed är sech extrem wou gfüut. wägedem hed gschtartet.